الخميس، 7 يناير 2010

باكى على الوكسة


الحياة هى
والممات هى
والفرح هى
والعذاب هى
مصر يا وسية
بايعة ليه فيا
ولا متباعه
ليه ماليش دية
عاشقة ليه واحد
باع وقال وطنى
وانتى يا بلادى
فى قلبه منسية
الحياة هى
والممات هى
والفرح هى
والعذاب هى
الحياة انتى
يامصر يا امايا
عاشق انا عيونك
رافعلك الراية
باكى على النكسة
باكى على الوكسة
من كتر ما ببكى
شتمتنى دمعاية
شقت دموعى النيل
وقلبى شمس أصيل
عمودى على رمسيس
يوم حملته الداية
وبردو كرهانى
وبردو بيعانى
ومين غيرى لطيورك
يفتحلها الغية
الحياة هى
والممات هى
والفرح هى
والعذاب هى
محمد أنور أبوزكرى

طلع البدر


مصر يا عينى مصر يا ليلى 
مصر نهارها هايصبح ليل
مصر ياويلى على مواويلى 

مصر التايهة جيل ورا جيل
مصر يا أمى بكرة تضمى 

قبري وإبنك يبقى ذليل
لما حمار بيقيد النار 

قولوا عليه ميت ألف دليل
جوا الجامعة والناس سامعة 

عمل العملة وخطب جليل
قتل الطلبه باسم الطلبة 

ويقول قال ما بيديش حيل
خدله وزارة بعد الغارة 
أصل الحارة فاكرها سبيل
وطنك دايما ديموقراطى 

طاطى يا محمد طاطى يا إميل
بكرة يقولوا طلع البدر 

وكلها نهبها وشبه الفيل
بكرة ياعينى مابقاش بكرة 

دى الأطفال هاتقول مواويل
راحوا يغنوا غنوة حزاينى 

جوا البيضة يدوسهم فيل
راحوا يغنوا غنوة حزاينى 

جوا البيضة يدوسهم فيل
محمد أنور أبوزكرى

الجدار


 ضاعت ما بيننا الحقيقة
تهنا فى ضل السور
وصاحبنا ماشى بيبكى
وضلع ليه مكسور
هايعمل إيه يا اخوانّا
ماهو مات خلاص مالجوع
يعلى صوته وبردو 
الصوت ماهوش مسموع
مين اللى كان السبب؟
والقصة والموضوع
جدار فولازى اتبنى
فضل الجدار مرفوع
فاصل ما بين الغِنى
والفقر إيد مقطوع
ومصرى قال يااخوانّا
فواعلى مش بنا
بنى الجدار علشان 
قال يمنع الممنوع
عليت صوتى بالبكا
بردك ماهوش مسموع
ماهو الحرامى سرق
واللى اتسجن مسروق
ماهو اللى قاتل هرب
والحق عالمقتول
مقالش عاللى قتل
واستنوا لما يفوق
إزاى ياناس الحق
تحت الجدار يندفن
خلاص يا كلمة لأ
فصّلنا ليكى الكفن
ومات داخلنا الضمير
شمينا ريحة العفن
أول ما بعنا الغاز
وبنينا حيطة فولاز
بقت حياتنا إزاز
متسرطنة من فوق
محمد أنور أبوزكرى

الثلاثاء، 6 أكتوبر 2009

عمال بلدى


عمال بلدي حالتهم ضنك

من يوم ما الخصخصة عملوها

قاسوا مرار والجوع خلاني

اقاسي حياتهم لما قاسوها

والتانيين عايشين في براح

لما بلادي قدروا باعوها

واحنا هنبدأ .. بكرة تشوفوا

مصر ولادها راح يحموها

عمال بلدي حاجة تفرح

وقفوا قصاد الآه والجوع

قالوا كفاية سرقتوا بلادي

قالوا الآه وبصوت مسموع

وضرايب عقارية بداية

قام الكل وراها مفزوع

عمال طنطا وسكة حديد

عرفوا القصة والموضوع

وبريد مصر وراهم برضو

والكل عشانهم موجوع

عمال بلدي بدأوا الحرب

إضرب راح يرجعوا بالضرب

مش هنبيع مش هنسلم

وكلامنا من جوا القلب

هنحارب وهتفضل لينا

وجوا قلوبنا ثقافة الحرب

واحنا معاكوا يا عمال مصر

ماشيين وياكم في الدرب

لحد ماتتحقق أهدافكم

ونكون أحسن حال مالغرب

محمد أنور أبوزكرى

الاثنين، 5 أكتوبر 2009

مصر ياللى عالمحفة



مصر ياللى عالمحفة
بيجهزوا ليكى التابوت
كلمة لجل ماتبقى عارفة
قبل ما ولدك يموت
قومى قولى للى ظالم
انتا واحد كالبساريا
وابنى بكرة هيبقى الحوت
قولى ياللى عالمحفة
بيجهزوا ليكى التابوت
يا بلادى يا صبيه
يامقاومة يا أبيه
ياللى كنتى بلاد قوية
بكرة يطلع ليكى صوت
ياللى انتى عالمحفة
بيجهزوا ليكى التابوت
مصر ياما راح تكونى
فووق بساط المجد تبقى
لما تلقى إبنك بيعلى
ويبقى فى الأعداء يشوط
مش هتبقى عالمحفى
يجهزوا ليكى التابوت
بس ابنك انتى امتى
يبقى صاحب الديار
ولا اقولك إمتى يقدر
إنه يهدم اللاهوت
امتى ياللى عالمحفة
بيجهزوا ليكى التابوت
محمد أنور أبوزكرى

باعوكى



آه يا بلد بسجون رخام
حابسك يهودى وقال هاخام
أو حبر دين .. إبن اللعين
إمتى بقى يصحوا النيام
آه يابلادى ياأسيرة
قولى باعوكى الناس بكام
باعوكى حاجة كدة ببلاش
وقالو قال إسمه السلام
والقدس ضاعت واحنا خلاص
عرفنا إنه جاى الخلاص
ومفيش كلام ومفيش مناص
لازتون تقولى ولا حمام

محمد أنور أبوزكرى

إقتحوا ليا التابوت


أهلاً بكم فى حيكم
نفسى ياأهلى أقلكم
إنتم كلاب
دامت حياتى فى عزكم

قهر وعذاب
والقدس ضاعت منكم

والكل خاب
حسنى صبح بعد الجمال
زباله مرميه فى هباب
والكل عاب على الكلاب
لكن الكلاب أشرف

من اللى يبيع بلاده
برخص التراب
وعبس ماشى كالمواشى
يديله لقمة .. يكسرله ناب
والناس تموت وانتم هنا
قاعدين فى عيشه نغنغة وآخر هنا
دى كلمه والآخر هاموت
إفتحولى يالا التابوت
ما هى الحياه مع العرب
أحسنلى منها إنى أموت
يالا بقى ياناس يا هوو
إنقذونى مالكلاب
وافتحوا ليا التابوت

محمد أنور أبوزكرى

الجمعة، 4 سبتمبر 2009

عاشقك

تصدقى عاشقك أنا من كام سنة
تصدقى إنتى المنى وانتى الهنا
تصدقى الموت عشانك دا الحياة
والبعد عنك.. موتى أنا
تصدقى حنيت إليكى
تصدقى قلبى فى إيديكى
تصدقى لو قلتلك .. إنتى أنا
بيكى أكون ولو هاهون .. يبقى الضنا
ليكى باعيش قدام عنيكى .. قلبى انحنى
قلبى أنا..
قلبى .. دا يبقى نيلك والهرم
هوا الحسين والمئذنة
قلبى أنا ..
قلبى يا مصر الزوق والناس الطيبين
قلبى يارحلة عمر وكفاح السنين
قلبى اللى عاشق حضنك الدافى
قلبى اللى قال الآه قام سمعها آهين
محمد أنور أبوزكرى

الثلاثاء، 1 سبتمبر 2009

أبو النجوم والشيخ إمام

والله زمان يا نجم هالل مالسما
عامل كما ..عقد إنما
عقد المحبة للبلد
شكله كما مصر اللى كانت إنما
إتزينت يوم عرسها
كان مهرها غنوة كتبها أبو النجوم
غناهالو الشيخ إمام
أما سلام عليك ياعم الشيخ إمام
لما تغنى الكون يقف
على غنوتك يرقص يميل
يلقى السبيل
يلقى إنه أصبح مستحيل
يبيع فى يوم
طب رأيك إيه يابو النجوم
يانجم واتحدى الغيوم
حارب بكل قوته
كل اللى باعوا بالرخيص
كل اللى ساوموا عالبلد
كل اللى هربوا فى الصراع
مات الضمير قتلوا الولد
وانتا يانجم واقفلهم
ومعاك كمان الشيخ امام
رجعوا التلامذة وبالعلام
عرفوا البداية بالسلاح مش بالكلام
واتجمعوا العشاق على عشق البلد
 وانت يانجم أكبر العشاق
عايز أقولك إن قولك يا ولد
يتوه والله قدامه كل الكلام
محمد أنور أبوزكرى

الاثنين، 31 أغسطس 2009

مهماً إن يطول الليل

مهما إن يطول الليل أكيد هييجى نهار
يصلّح اللى إنكسر ويقصم الزنهار
اللى على الدم عايش ومحتمى بأسوار
أسوار حديد مابتنكسرش ..لكننا شطّار
نقدر نعدى السور ونقتل الزنهار
...................................
مهما إن يطول الليل هتيجى فجرية
ساعتها يصحى الطير ويكسر الغية
فى لحظة يلقى الأمان ويطير بحرية
أكيد فى يوم هصحى مهما إن تعيب فيا
ماهى الحياة كدهه .. يوم لك ويوم ليا 
.......................................
مهما إن يطول الليل الضلمة راح تنزال
تلقى اللى فوق إنخسف وتاه وسط الرمال
وضاع فى دنيا العدم لانفعه جاه ولا مال
أما اللى فى الدنيا عايش يشتكى الأهوال
تلقاه غرق فى العز وكتر جاه وعيال
ماهو ربنا فى لحظه بيبدل الأحوال
.....................................
مهماً إن يطول الليل الشمس راح تلمع
وتلاقى اللى هيفهم وتلاقى اللى يسمع
ساعتها تصحى الناس تبقى حيوش تجمع
ضد اللى سرق القوت ضد اللى عاش يطمع
ضد اللى عاش عمره فى كرشه مال يبلع
محمد أنور أبوزكرى

رباعية


قلت لرئيس الحرامية اللى واخدها بجدارة
شعبك بقى بياكل حجر أكله أو تسيب الإمارة
نادى بصوت مدبوح هاتوا وكيل المغارة
وقال له ماتنساش تدى لولى العهد توكيل الحجارة
"وبلدى"
محمد أنور أبوزكرى

مصر ياما يا سفينة

مصرياما يا سفينة ........ قبّطانك ديب سحلاوى
بكرة هيغرق ولادك ........... أصل دوا شيطان مخاوى
مصر ياما فين ولادك................ لملميهم مالقهاوى
صبحوا عالة فى سوق دلالة ....... منصابين طب مين يداوى
ولاّ صبحوا يادوب ولادك .......... موجودين لجل الغناوى
علشان يقولوا تحيا مصر ........ ويرفعوا راس البلاوى
بعتى نفسك للى يدفع ............. يالا نقط ياللى غاوى
مصر يا جنة حارسها شيطان....... إشتراكى وباع فيكى وقتل (رضوان)
داهية فى صنع الحيل ............غلب فى الشيطنة ملوك الجان
غلب مسولينى إيطاليا ........... ونابليون فرنسا وهتلر الألمان
باع البلد للعدا وعامل عاشقها ......... واللى عشق يابلادى هوا نفسه اللى خان
محمد أنور أبوزكرى

السبت، 29 أغسطس 2009

عايز أسافر .. ألاقى القوت (قصيدة)

عايز أسافر
طب على فين
على دولة للبنى آدمين
طب كلم يا سعادة البيه
ممكن أعرف مين الريس
أنا -لامؤاخذة - مواطن مصرى
ومين الباشا
أنا الداخلية
حصل الرعب وموت الراحة
طب بالراحة شوية شوية
إنت مسافر
أيوة يابيه
طب ليه مسافر وعشان إيه
علشان أنا مش لاقى القوت
وكرهت انى اكون كتكوت
أو اعيش عمرى هس .. سكوت
يبقى أحسنلى إنى أموت
مصر بلدنا أم الكون
فيها تتكلم فين ماتكون
ومفيش حجر عليك فى كلامك
حتى إن قلت البيه مجنون
أنا مش عاوز أكون كلامنجى
أنا بحلم إنه يكون ولدى
رافع الراس .. زى الناس
اللى بييجوا فى التليفزيون
طب بس اسمع
أسمع مين
وأسمع إيه دا كلام مجانين
أسمع وطنية و وتعريف
أنا آسف دا كلام تحريف
بدل الـ (ف) كنت أقصد (ص)
هس اسكت بطل تخريف
أنا خرفت فى إيه وحياتك
أنا آسف أنا قصدى شريف
بس دى كلمة حق وطلعت
من غير ماقصد أصلى نضيف
فعلى نضيف .. مش إسمى نضيف
واسرق وانا غاززك بالسيف
وانهب واكل قوت الشعب
وأبيع مصنع فيه عمال
وأقفل باب اخواتنا فى غزة
وأبيع كرامتنا بالمال
بتقول إيه يا قليل الذمة
بالذمة شعبنا مش عايش
واكل .. شارب
قاعد .. نايم
واخد حقه وكمان حايش
يعنى بيكسب بدل القرش
 خمسين قرش
قرب يتعب شعبنا دا
من ملو الكرش
أمال دعم الزيت والسكر
ولاّ رغيف العيش فى الفرن
ولاّالشعب دا عاوز إيه؟
عاوز ياكل حق الناس
اللى مرادها إنها تحميه
ويقول فى الآخر أنجاس
آخر مرة نزلت الشارع كانت إمتة
شوفت إزاى الشعب بيشحت
شحات يشحت من شحا
ت
فى الآخر شعبنا يتغرغر
لأ وحياتك أصلاً مات
مين قال إن الشعب فى أزمة
لأة دا عايش عيشة ملوكى
يمكن إنت شواذ القاعدة
إنت لوحدك الصعلوك
لأ وحيات مليون مصري
لأ واقصد 80 مليون
عايزين ياكلوا بس مفيش
واللى محششس .. واللى مبرشم
واللى فى ليلة بقى مسجون
علشان شافه صاحب فرنة
 بيسرف عيش
أصله مفيش
أصبح شعبنا حلمه الطقة
نفسه فى زقة
تاخد عمره عشان الأزمة
تروح ماتجيش
أصله مفيش
وانت سيادتك نايب الشعب
لأ أنا الشعب
جدى مات برصاصة فى القلب
فى ثورة سعد
وأبويا عابر برليف
لأ وتلاقى حتة وغد
يقول أنا كنت وكنت وكنت
كنت دا ماضى ليه ما بقيتش
يبقى بإيه وازاى ولمين
لشوية ناس مخها طين
فاكرين هما هيعملوا حاجة
وهما شرازم منحطين
لأ وبقولك
اللى إتكلم واللى إتألم قال الآه
دول هما الناس الفاهمين
وقولى ياسيدنا
أيوه يا عم
سجننا فيه كام واحد مصري
دخل السجن عشان قال لأ
واللى مقالش إزاى بقى عايش
غير بالزق
طب فين تطبيق القوانين
طب واتسجنم دولم ليه
علشان كلمة لأ بتوجع
 الحرامية ولاد الإيه
شكلك شارب يابنى سيجارة
أقاري كتابين لجيفارا
أوبتحب كلام (عب ناصر)
والحبيبة اليساريين
طب دول مالهم
ناس خاينين
مافيهمش لا زمة ولا دين
شوفت جنازة عبد الناصر
كانت إزاى
أبويا وعمى جم على مصر عشان يشوفوها
ويشوفوا الريس (عب ناصر)
اللى حبيبوا بالملايين
واللى حلف بالقسم الأعظم
 إن وطننا العربى فى يوم
لازم هيقوم
يعمل وحدة ويرجع تانى
وراية الوحدة لابد تدوم
لأ داكلام واحد كان ميت أو موهوم
عايش مش فاهم ولا حاسس
إن موارد بلده قليلة
لأ منهوبة ياعم الحج
واللى نهبها فى نظرك مين؟
أولاد الكلب الملاعيين
اللى على دمنا عايشين
ومش عايزينا ندوق الزاد
إخرس واخرج برا يا كلب
أنا تعبان والله مالضرب
فبلاش تضرب .. أنا عايز أهرب
برا بلدنا معايا الشعب
أقوللكوا حاجة .. إستوردوا شعب
ويكون صينى أو تايوانى
وماعندوش حصبة ولا قلب
ولا أمراض الدنيا داهية
أمراض حكر بقت عالشعب
يالا إخرج.. أنا خارج لكن
راجع تانى عشان أثبتلك
إن الشعب لابد هيصحى
ويعدل كل الأحوال
ويخلى السايد محكوم
والريس مش هوا جمال
والريس مش هوا جمال
محمد أنور أبوزكرى

الجمعة، 28 أغسطس 2009

مين اللى باع؟

مين اللى باع .. واللى إشترى .. وباع بكام؟
مين اللى قادر وافترى .. إبن اللئام؟
مين اللى مانع عننا حتى المنام؟
باع الضمير واشترى غراب إسود .. بدل الحمام
....................
غزّا الغراب وأكله من لحم أخوه
باع الإخوة وضيع وصية أبوه
لما قال له الغراب دا أعدى أعدائك
ربا الغراب وقال لحراسه
لما يجوع من لحم أخويا إدوه
.....................
بكرة يجيلك يوم تبكى عنيك بالدم
يكون عليك الدور تشيل يا صاحبى الهم
تقعد تدور على أخ يشيل همّك
لكن الغراب كان كل أخوك وإبن العم
دلوقتى يا حسرتك صعبة عليك الآه
محمد أنور أبوزكرى

الأحد، 23 أغسطس 2009

الأبعدية (قصيدة)

هىّ غنوة ولاّ قصة ولاّ ناس بايعة القضية
هىّ بلدى ولاّ ولدى ولاّ جسم بدون هوية
هىّ أشباح الهوان ولاّ فرد مالوهشى دية
هىّ فلاح كان بيزرع .. كان بيحصد ولاّ هىّ
هىّ زى ما كنت قايل .. هىّ أشبه بالوسية
تبقى هىّ الأبعدية
هىّ صوت الآه يدوى .. تلقى آه ورا كل باب
هىّ فلاحين فى غيطهم .. دابوا فى العيشة الهباب
ولاّ هىّ البيه فى قصره .. كان بيتغدى كباب
شافه واحد قاله حتة .. قام مسيبله الكلاب
شد سوطه عالغلابة .. وقال دى مش متسابة هىّ
دا انتو جوا الأبعدية
ولاّ دى ناظر زراعة .. كان بيضرب بالعصايا
اللى يسرح واللى يمرح .. فجأة صبح الضرب غاية
عشقه يضرب كل واحد .. خلاّ ضرب الناس هواية
حقه يضرب ده لأنه .. ما حد قاله فى يوم كفاية
حد صاحى من البداية .. حد عايش للبقية
حد جوا الأبعدية
محمد أنور أبوزكرى

الخميس، 20 أغسطس 2009

بحب كل الناس (قصيدة)

بحب كل الناس ................ الفاضى والمليان
بعشق أمى وأبويا .............. وأخويا والجيران
وإنجى وآية واحمد ............ واحب كمان نوران
وامين وعم عادل ............. حبايبى من زمان
واحب أمجد وأكرم ............ وهيما وسليمان
ومصر أم الدنيا ................ والجزمجى شعبان
ومصر فرد فرد ...............حتى حسنى وسوزان
وصلاح بتاع البقالة.......... وهشام البيزنس مان
وكمان إسراء ومروة ....... والمساجين فى الليمان
بحب كل واحد .............. مبسوط أو كان تعيان
عايش شايل رقابته ......... أو حاسس بالأمان
صاحب شركات ومصنع ... أو قهوة فى الميدان
له كرش حوالى طن ......... أو بطنه مش تبان
ساكن فى قصر فخم ......... أو أوضة جوا خان
ياكل من أغلى مطعم ........ أو كان عايش جعان
لابس من أغلى ماركة ...... أو حافى أو عريان
ساقى الناس الإهانة ......... أو راضى بالهوان
راكب b.m.w ............. أو ميكروباص نيسان
بحب دول ودول ........... وبعشق المكان
ليهم حبيت أقول ........... لو تعدلوا الميزان

محمد أنور أبوزكرى

( عام 2011 ) ما بين الصحوة وضياع الهوية‏ (مقال)


دعوة للصحوة قبل التيه فى بحر الآمال الزائف
كلنا يعلم ان فى عام 2011 سوف يتم إعلان حقبة جديدة من الديكتاتورية المغلفة بالصهيونية (فماذا نحن فاعلون؟؟) هل سنقاوم ونخوض التجربة أم سنجلس نرتجى عفو ربنا ورحمته وندعو ونحن على فى أزقة التيه؟ هل سنعلن العصيان على الجوع والفقر والبطالة أم سنعلن الفرحة بالديموقرطية الزائفة فى عصر ضاعت فيه معالم الحياة هل سنصرخ فى وجه الظالم أم سنبكى على أطلال أحلامنا الضائعة بين نعيم الجنة الزائفة وبين إحتراق نار الملكية فى أجسادنا.
هل ستصبح مصر هى الجنة الموعودة أم سيعود زمن الوسايا والأبعدية
ومن سيقوم بالتغيير مع العلم أنه لم ولن يصبح التغيير تغييراً إلا من أسفل أي أن الشعب وحده فقط هو الذى يستطيع التغيير
وهذا المقال عبارة عن تساؤلات لن يستطيع الإجابة عليها إلا من ذاق الضياع ومن تاه فى وسط تعارض الأيدلوجيات وازدحامها بين مؤيد ومعارض وما بين اشتراكى وناصري وإخوانى ومابين يمين ويسار وما بين عدة أحزاب لا يجمعها سوى حب استقطاب الشباب المحب للعمل السياسى والمحب لبلاده ومابين عدة حركات فى أول الأمر تكوّنها شباب طامح إلى الوصول للحقيقة وبعد الظهور الإعلامى لتلك الحركات تتحول إلى شو إعلامى ليست حركة فى حب الوطن
هل بعد هذا يمكننا القول بأن هؤلاء يمكنهم التغيير؟؟
هل سيمكننا القول بأنه يمكن أن يخرج من بين هؤلاء من يوحد الصفوف للوصول إلى الدف الأسمى وهو القضاء على الاستغلال وتحكم رأس المال والقضاء أيضاً على تلك الحكومة الغاشمة وذاك الحاكم الطاغية (ذاك الحاكم الصهيونى) الذى تحركه آليات الحكم الأمريكى وتحركه دولة الصهاينة ذاك الدوبلير الذى يقوم بآداء دور الإستعمار داخل الوطن العزيز (مصر) هل سيمكننا القول بأن هؤلاء يمكنهم منع سياسة التوريث المتفشية فى الوطن العزيز مصر بداية من الوظائف الحكومية والخاصة وصولاً إلى رئاسة الجمهورية التى ستصبح - إن لم نقاوم الظلم - دولة يحكمها ملك أم هل سيمكننا القول بأنه سوف تتوحد تلك الأيدلوجيات والتيارات والحركات -المتعارضة فيما بينها - لمقاومة حقبة الهاوية التى سندخلها فى القريب العاجل بعد وصول جمال مبارك للحكم فى عام 2011م وبعد الإنتخابات الرئاسية وفى الختام أناشد كل القوى السياسية بالوصول إلى حل يرضى جميع الأطراق قبل الوصول إلى( حل وسط الشعب ) وضياع الهوية المصرية إلى الأبد وسيكون النادم فى هذا الموقف هى تلك القوى ( المتناطحة ) فيما بينهاوعلى العموم لا تعتبروا هذا المقال تشاؤماً من قبلى بل هو محاولة لإيجاد ثغرة للوصول إلى قلوب الشخصيات المؤثرة فى الواقع السياسى المصرى الذى أصبح فى واقع الأمر أشبه بعراك الديوك وصاحب العشة يشاهد هذا العراك ويضحك عليهم وكأنه يشاهد مسلسل كوميدى أمام التلفاز (فحاولو أن تتحدوا قبل أن نصل جميعا بعد 2011 إلى منطقة ضياع الهوية.
محمد أنور أبوزكرى

الأربعاء، 19 أغسطس 2009

البهلولى أبو نضارة (قصيدة)

البهلولى أبو نضارة
دكتور عاوز له دكتور
دايماً إيده فيها سيجارة
بس الشاب ياناس معذور
عاوز حقه فطالب بيه
آمن إن الحق فى يوم لازم يلاقيه
فكّر فكرة.. صبحت رسمة
رسم الظابط داس بالجزمة
عاللى إتمنى تتوه الأزمة
أشرف حاول يبنى الحلم
حلم الجنة اللى بيتمنى
لما نشد بقوة العزمة
نلقى لكل سؤال الرد
أشرف رسم الرسمة بجد
رسم الدنيا فى وسطها سد
فاصل بين البنى آدمين
فاصل بين باشا وصعلوك
بين المالك والمملوك
أشرف صاحبي
رسم المصرى رافع علم البلد الحرة
مع إنها عرضها مهتوك
رسم الغنوة فى عيون مصرى
وقت الغارة
رسم العيل ماشى بيلعب جوا الحارة
رسم الجار اللى بيتعارك ويّا الجارة
ماهو دا صحيح أشرف يا خوالنا
البهلولى أبو نضارة
محمد أنور أبوزكرى

الثلاثاء، 18 أغسطس 2009

ثورة الرغيف (قصيدة)

اللى فوق مهيسين...................واللى تحت مفلسين
واللى فى الوسط إتلغو..............يحيا الشمال.. يحيا اليمين
اأنا مش سياسى فى الحقيقة........أنا شخص واقع فى الكمين
والحقيقة يابويا مُرة................أشكى مين وأقول لمين
اللى فوق ياكلو الباتيه..............والجاتوه وباتون ساليه
والفقير صبح رغيفه...............فى السوق السودة بجنيه
والفقير صبح أنانى.................ياكل الوجبة بعشرة جنيه
الغنى أصبح بيدمن.................والفقير إدمانه مزمن
الغنى يدمن مخدر..................والفقير يدمن رغيف
فى الشتا بيشم واحد................ويخمسه عشرين فى الصيف
ياللى أخدت أقوات الناس..........من رقابيهم شيل السيف
إقتل.. إدبح.. لجل ماتفضل........والله الدبح دا يبقى خفيف
موت واحد ..موت عشرة..........أو حتى تموت ع الكيف
يا نضافتها جيوب الفقرا...........نضفتها والله يا خفيف
واسمح لى اقولك يا خفيف.........ياللى فاكر انك شريف
مش هتقوم لنا قومة إلا اما.........نثور ع الظلم ونبقى رجال
فاهم ياللى بتسمع قولى............قولى صداه يغير الحال
إسمع وافهم.. بص وشوف........شوف السرقة عالمكشوف
الفقير مش لاقى رغيف...........والباشا بياكل فى خروف
خلاص بقى لازم نثور............أوهيلبسنا الطرطور
ويقولنا إن اللى هيخضع...........فى الآخر ليه فى الجنة الحور
أقولكم إن اللى هيخضع............مش هيشوف بعنيه النور
مدام كدة ميت كدة ميت............يبقى بشرفك أحسن ليك
تبقى فدائى الكل هيشكر............وقلوب العالم تناديك
تبقى جبان الكل هينفر..............برضه الموت أهو مستنيك
محمد أنور أبوزكرى

الاثنين، 17 أغسطس 2009

أدينى باكتب (قصيدة)

أدينى باكتب وانا عارف الناس فى ضياع
كاتب مؤلف على شاعر أنا بالأوجاع
الجوع بيوجع بس ياناس كفاياكو نزاع
على دى الفلوس اللى ما تشبع واحد لوجاع

واحد يقوم قايم ويقول أنا أغنى الناس
وقالوا عنى فى الكونكان أنا أبقى الآس
كل أما أروح فى مكان..قدمى تنباس
قول لما يروح المال راسك تنداس
حتى هدومك يا حبيبى تلاقيها تنباع

وده كمان راجل فى الشركة مدير
حرامى يسرق مالشركة المال قناطير
والصبح بيروح على شغله واللبس حرير
يوم يتعرف إنه السارق مالشركة يطير
ويتسجن من غير حتى ما يقولو وداع

وده يا ناس إنسان مالفقر جعان
عائل لأسرة والأسرة من خمسة كمان
ما يمد أيده ولا حتى يطلب إحسان
أدى الزمان اللى يبين البشر الوان
بكرة تكون فوق عالقمه وتخرج مالقاع

يا مسلمين إسمعوا منى الكلام
فين التكافل اللى فرضه علينا الإسلام
واحد بيفضل صاحى مالجوع وإنت مالشبع بتنام
والله الكلام دا ياموحدين بالله حرام
طب لو يضيع بينكوا الضمير طب فين ينباع؟
محمد أنور أبوزكرى

الحلزون والحلزونة (قصيدة)

الحلزون والحلزونة……. يا بلادي يا بنت المجنونة
عايش بندب على تعليمي…….والفايدة اللي ماهيش مضمونة
اتعلمت سنين وسنين…….علشان اكسب دنيا ودين
فجاة لقيتني وبعد مرار…….موجود جوه في الحلزونة
الحلزون والحلزونة
الحلزون هو اللي خانقنا…….لافف على رقبة اهالينا
منيوم مولدنا وواعدنا…….بوظيفة علينا مرهونة
نتعلم اعدادي وثانوي…….ودروس خصوصية بالغالي
ولما تعبنا وقلنا يالهوي…….قام دخّلنا في الحلزونة
الحلزون والحلزونة
الحلزون واقف متحيّر…….عامل انه عقله صغيّر
لكنه في لحظة يتغيّر…….يعصر لنا عالبحر لمونة
جيت اقوله تعبان ماديا…….والمصاريف بقى غالية عليا
قالي ادفعها كاش نقديا……..والا هتدخل في الحلزونة
الحلزون والحلزونة
والجامعة بقت سجن الطلبة…….والسجّان ده مالداخلية
يضرب يوجع بالتقارير…….وامن الدولة بيلمونا
فيها ايه لما يكون موظف……..يحرس باب الجامعة وأمنه
على الاقل الجامعة هتنضف…….من اللي بيرموا في الحلزونة
الحلزون والحلزونة
والتعليم في الجامعة دي فاشل…….فشله ده جاي من انه قديم
نتعلم ننقل في دفاتر…….والدورات اسعار مجنونة
ليه منطوّرش التعليم…….قالوا هيحصل امتى وكيف
لما يقولوا عليا نديم…….ويزقوني في الحلزونة
الحلزون والحلزونة
محمد أنور أبوزكري

يوم السادس من ابريل (قصيدة)

يوم السادس من ابريل…….هيخلينا في بهجة وخير
لما نثور على ظلم الحاكم……ونعدل احوال الجيل
هيخلينا نعدي السور…….من الضلمة هنخرج للنور
ونحاكم كل البرتيتا……..ونصلّح كل المكسور
وهيبقى في ايدينا مصيرنا…….وماهيكونش الشعب ذليل
يوم السادس من ابريل
يوم السادس من ابريل…….يوم واحد في العام كله
فيه نخلص ونخلّص روحنا…….من اذلال الشعب وذله
ولا هنعيش دور الخدّام…….اللي طول عمره في الضلة
وهانشكي ونحكي الحكايات…….اصل سكوتنا ده حاجة مملة
وهنصرخ ونبص نقوله…….العلبة دي مافيهاش فيل
يوم السادس من ابريل
محمد أنور أبوزكري

نشتكي لله يا بلادنا (قصيدة)


نشتكي لله يا بلادنا…….اللي سقطت من عنينا
بعد ميت الف احتلال……. م الاجانب جم علينا
جه احتلال عم سوسو…….وشلته اللي بترازينا
مصر ياللي خليتينا…….نبكي بالدمع في عينينا
واحنا كنا في انتعاش ……. من زمان من عهد مينا
كنا في عصر الملوك …….فرحانين بابن الذينا
اللي هيخلينا فوق…….اول ما داس قام داس علينا
سخر السخرة بطريقته…….باع في غازنا وباع وادينا
باع بلادنا كلها…….من الصعيد ولحد سينا
باع هوية وانتماء……..واشترى قصر بجنينة
طبّع التطبيع سيادته……مع صهاينة بتعادينا
وفى خطبته العصماء كلامه……يشرِح في قلوبنا الحزينة
يقول عليكم شيئ بسيط……والمحال خلوه علينا
وفي ختام الكلام تحس…….انه حامي حمى المدينة
محمد أنور أبوزكري

معاهدة شر (قصيدة)

في يوم اتعاهدت العتمة مع الذلة
كانت معاهدة شر شكلها بان خير
اتعاهدو يقتلوا النور والكرامة
في قلوب الناس ويدبّحوا في الطير
واللي يقول الحق يبقى عبيط
عبيط واهبل وبريالة وسيئ سير
وسلوكه ضاربة وهيروح ورا الشمس
يروح الخانكة (اوضة العزل) فيها اسير
بزعق باعلى الصوت بحبك (يا مصر بحبك)
وكلامي كان علشانك لكن مين يسمع
اذا كان السجّان اصلا من المحاسيب
اللي بيعشقوا العتمة… لأ… ده هو العتمة نفسيها
وهو الضلمة خانقانا بشكل عجيب
امتى يعود النور وينكسر قضبانهم العالي
امتى اعود واحلم واغني تاني موّالي
هو انا حلمي حرام …
اشمعنى امريكا
ام الخمسميت عام فيها الحرية مكفولة لكل الناس
اللي ابيض واللي زنجي… الفقير وابن الكبار
ولا انتي يا مصر حاسّة بازدهار
على ايد حديد قوية بتضرب ليل نهار
وانا اللي في الآخر بموت من ضربة قتلاني
محمد أنور أبوزكرى

خلاص يا بلدي يا قوّاله (قصيدة)

خلاص يا بلدي يا قوّاله
من امتى وولادك عالة
وكلاب بتنبش في زبالة
ناهيك عن الهدمة البالة
ولامتى دايمة دي الحالة


عايشة يا بلدي عالاحسان
وعندك الخير ملو حفان
ويتسرق يختفي ما يبان
ولا معونة الامريكان
بشيك دي ولا حوالة

لجيبكم المال يتحول
على طول بسرعة أول بأول
والشعب يشحت يتسوّل
مش كنتوا قلتوا من الاول
دي بنوك سويسرا دي حمّالة

يا اصحاب اللبس الفاخر
ياللي عملتونا مساخر
ده كل ظلم وله آخر
الهي تولعوا في بواخر
وتكون سياحي ورحّالة

امنى اشوفكم من المساجين
يا نصابين…. يا نهابين
يا رئيس على شوية مجانين
املا وعبّي… الناس نايمين
مصنع علاء ناقصاله آلة
محمد أنور أبوزكرى

البلد دى ملك مين؟ (قصيدة)

البلد دى ملك مين؟....
ملك الغنى؟ ملك الفقير؟
ملك الوزير؟ ملك الغفير؟
ملك اللى عامل ولاّ المدير؟
ولاّاللى عايش عالحصير؟
ملك اللى عامل فيها بيه؟
ملك اللى مش لاقى الجنيه؟
طب ملك مين؟
طب ملك واحد مالحمير
اللى مالينها نعير
عملوا اللى شبه المستحيل
ضربوا الصغير ... خاف الكبير
باعوا البلد بكام جنيه
وازاى وليه باعوا الضمير
باعوا غازنا لإسرائيل
بكرة عليك الدور يانيل
يبقى السؤال؟
البلد دى ملك مين؟
ملك الغنى؟ ملك الفقير؟
ملك الوزير؟ ملك الغفير؟
ملك اللى عامل ولاّ المدير؟
ولاّاللى عايش عالحصير؟
القى الجواب فى عنيا يسطع فى الأثير
البلد دى ملك اللى مرمى فى حضنها
ملك اللى مدلها إيده وضمها
ملك اللى حارب فى الميدان
ملك اللى شال غصن الزتون
وشال فى إيده التانيه سيف كبير
تبقى البلد ملك الولد اللى يحارب لجلها
ملك اللى رافض هجرها أو حجرها
واللى يبوس على خدها..
يديها كل ما تشتهى
من غير ما يطلب أجرها
محمد أنور أبوزكرى

من إمته عايزينه الرئيس (قصيدة)

من إمته عايزينه الرئيس
من امته كان إبن البلد
لو هو كان راجل حسيس
ماكانشى أصلاً اتولد
كان قال لابوه لانتا ملك
ولا أنا أنفع أمير
دوا رئيس بالزمبلك
بتحركه دولة صهاينة إسرائيل
لاهوا ينفع فى يوم زعيم
ولا فى يوم يصبح ملك
لو شال ساعتها الزمبلك
لو شال ساعتها الزمبلك
خلاص أنا راح أقول واعيد
هى بلدنا وملكنا
مش راح نسيبها للعدو
اصلا سعادته أبن مين؟
إبن اللى قاتل شعبنا!!
ضيع ولادنا فى الوبا واحنا هنا
ضايعين ياناس برضيك
فى بلادنا قوتنا مش لنا
ومن هنا..
بنقول سعادته فين مكانه
واحد حتى السياسه كان دارسها فى بلاد العدا
حتى الدراسه يامؤمنين فى انجلترا
يعنى فى بلاد الصهاينة
يبقى بيحب اليهود
واحنا تايهين فى التواجد والوجود
خلاص بقى لازم نثور
ثورة تمنحنا الحياة
ثورة تبدأ مالسكون
تنتهى بطوق النجاة
يالا نبدأ.. لما نبدا
نلقى فى الدنيا أمل
لما نبدأ كلنا
نلقى سوا نبض الحياة
محمد أنور أبوزكرى