ملك الغنى؟ ملك الفقير؟
ملك الوزير؟ ملك الغفير؟
ملك اللى عامل ولاّ المدير؟
ولاّاللى عايش عالحصير؟
ملك اللى عامل فيها بيه؟
ملك اللى مش لاقى الجنيه؟
طب ملك مين؟
طب ملك واحد مالحمير
اللى مالينها نعير
عملوا اللى شبه المستحيل
ضربوا الصغير ... خاف الكبير
باعوا البلد بكام جنيه
وازاى وليه باعوا الضمير
باعوا غازنا لإسرائيل
بكرة عليك الدور يانيل
يبقى السؤال؟
البلد دى ملك مين؟
ملك الغنى؟ ملك الفقير؟
ملك الوزير؟ ملك الغفير؟
ملك اللى عامل ولاّ المدير؟
ولاّاللى عايش عالحصير؟
القى الجواب فى عنيا يسطع فى الأثير
البلد دى ملك اللى مرمى فى حضنها
ملك اللى مدلها إيده وضمها
ملك اللى حارب فى الميدان
ملك اللى شال غصن الزتون
وشال فى إيده التانيه سيف كبير
تبقى البلد ملك الولد اللى يحارب لجلها
ملك اللى رافض هجرها أو حجرها
واللى يبوس على خدها..
يديها كل ما تشتهى
من غير ما يطلب أجرها
محمد أنور أبوزكرى
ليست هناك تعليقات:
إرسال تعليق
علق هنا